Demişəm: İslamın zərrəsiyəm mən, Allahınsevdiyi bəndəsiyəm mən.
Allahın sevdiyi bəndəsiyəm mən
Tanrı yay gecəsi yazıb baxtımı, Qurub sübhə qədər tacı-taxtımı. Elə ki, doğulub, səsim çıxdımı, Demişəm: İslamın zərrəsiyəm mən, Allahın sevdiyi bəndəsiyəm mən.
İlk eşqim gələndə yaşım da nəhsdi, Deməyin ilk sevgi ötəri hissdi. Eşqi işrəti yox, nəfəsi bəsdi, Əzəldən məhəbbət xəstəsiyəm mən, Allahın sevdiyi bəndəsiyəm mən.
O şən uşaqlığım xəyaldı, keçdi, Gənclik bulağından könlüm su içdi. Demədim dünyanın axırı heçdi, Yaşamaq yaratmaq təşnəsiyəm mən, Allahın sevdiyi bəndəsiyəm mən.
Dosta dost olmuşam, namərdə yaman, Həyatın özünü etdim imtahan. Başımın üstündə qopsa da tufan, Haqqın - ədalətin gu səsiyəm mən, Allahın sevdiyi bəndəsiyəm mən.